Ka hoki ngā whakaaro o Deanne ki ngā Kīngi me ngā Kuini o Ingarangi, ā, ki ngā akoranga o tana taitamarikitanga. Ka akiaki ia i ngā kaiako ki te whakaora i te hītori Māori hei oranga mō ngā tamariki mokopuna o ēnei wā
Ka hoki ngā whakaaro o Deanne ki ngā Kīngi me ngā Kuini o Ingarangi, ā, ki ngā akoranga o tana taitamarikitanga. Ka akiaki ia i ngā kaiako ki te whakaora i te hītori Māori hei oranga mō ngā tamariki mokopuna o ēnei wā
Kia ora koutou. Ko Deanne Thomas taku ingoa, ko Ngāti Kahungunu tēnei e mihi ana ki a koutou.
Kātahi ka puta te puka aratohu kua kīia nei Te Hītori Māori ki roto i Aotearoa: He Aratohu mō ngā Pouako Tau 1–4. He mea hou tēnei. I roto i te wā i kuraina ahau – hei tauira – ko te hītori, te hītori nō Ingarangi, te kōrero e pā ana ki ngā Kuīni me ngā Kīngi o taua whenua, tae noa ki ngā kaupapa pērā i te Russian Revolution me kī, Irish Potatoe Famine. Mōhio mārika ahau ki ērā mea katoa. Heoi anō, hei tauira kore rawa au e mōhio ki ngā kōrero Māori o ō tātou nei tīpuna.
Ko tēnei pukapuka ka puta he aratohu mā koutou – e kaiako mā – kia kite atu i te tino kaupapa, ā, kia mōhio ngā tamariki ki ngā kōrero o ō tātou nei tūpuna me ngā mahi e kawea ana e rātou hei tauira mā tātou me kī.
Ko ngā tāngata pērā i a Te Rauparaha, Te Whiti o Rongomai, Tohu Kākahi, Tāwhiao, Te Atairangikaahu, ko wai atu, ko wai atu, ko wai atu. He aha te take ka mōhio ngā tamariki ki a Nelson Mandela, ki a Martin Luther King, heoi anō, kore rawa rātou e mārama ki ngā mahi a ō tātou nei tūpuna. Tuarua, ka tika me mahi ngā tamariki i ō rātou ake whakapapa. Ka tika ka mōhio rātou ko wai rātou, nō hea rātou, he aha ngā kōrero ā-rohe, he aha ngā tūāhuatanga o te whenua i tō rātou nei rohe.
Nō reira kaiako mā ko tēnei pukapuka he aratohu, he whakaaro, tērā pea he ara mā koutou katoa kia tū rangatira ā tātou nei tamariki mokopuna.
Kia ora koutou.
