He huihuinga kōrero nā Te Kāhautu Maxwell, Tom Roa, me Kingi Kiriona mō te ‘Atua Whiowhio’, he kupu whakaari nā te poropiti Māori nā Te Kooti, mō te taenga mai o te rerewhenua ki roto o Maniapoto. Ko tōna otinga, he murunga hara, he murunga whenua, me tētahi wharenui kei Te Kūiti e tū tonu mai rā.
Koinei pea te mahi piere nuku. He pai te rangahau, he pai hoki te wānanga ki ngā rekereke o ngā pūkenga, engari, me pēwhea te whakaputa i ēnei ki te ao, ki te hapori, kia ora tonu ai haere ake nei? Anei ētehi huarahi whakarauora:
He motuhake te whakawhanaungatanga; he pūmanawa, he tikanga iho matua ki a tātou te iwi Māori. Me toro atu ki ngā kaumātua ki ngā ahi kā, ki te iwi o tō hapori, he puna mātauranga kei te kapu tonu o ō ringa. Me mōhio koe ko wai rātou, kia āhei ai koe ki te noho ki ō rātou rekereke, ki te ako i ngā kōrero tuku iho.
Tirohia tō whenua, tirohia ō maunga, tirohia ō awa, tirohia ngā rori, he aha rā i reira 100 tau ki muri? Mā tō taiao koe e ārahi. Kei reira ngā kōrero hei whakarauora māu, haere ki ngā puna mātauranga ki te rangahau i ēnei pakiwaitara, i ēnei pā pakanga, i ēnei tūtohu whenua.
